آخرین مطالب سایت

آذربایجان ماهنیلاری (1)

آذربایجان ماهنیلاری (1)

دونیا موسیقی عالیم لرینین دئدیکلرینه گؤره موسیقی نین ایلکین سازی اینسانین اؤز سسی وبوغازی اوُلموشدور و ائله جه ده ایلکین اینسانلار حتی دیل علمینه اَل تاپمادان بئله، اؤز دویغولارینی سسلری نین هاواسی (آهنگ)له بیلدیره میشلر، میثال اوچون اُوچولوقدا، دؤیوش مئیدانلاریندا ها بئله غم – کدر و یا سئوینج و شنلیک چاغلاریندا اؤز سسلرینه اویغون هاوالاردان فایدالانمیشلار.
araz
زامان اؤتدوکجه اینسانلار اَلیله موسیقی چالارلاری(موسیقی آلتلری) یارینیر و هرمیلتین اؤز روحیه سینه اویغون هاوالار قوشولور و اوخوماقلار چالقی ایله بیرله شیر. بئله لیکله موسیقی یئر اوزونده جانلانماغا باشلاییر.

زامان زامان اینسانلارین گونده لیک یاشاییشیندا اؤزو اوچون گئنیش یئر آچاراق، دونیادا دانیلماز بیر مدنیت یارادان بیر صنعته چئویریلیر. اینجه صنعتین اؤنونده گئدن موسیقی بوتون دونیادا، اؤزه للیکجه آنا یوردوموز آذربایجان دا چوخلو ائنیش – یوخوشلو و اولدوقجا فیرتینالی یوللاردان سوُوشوب زامانلا آیاقلاشاراق ایندیکی چاغیمیزا گلیب پاتمیشدیر.

وقتی ایله اینسانلارین اؤز یاشایش حیاتی اوچون یارانمیش موسیقی داها بو تکنیک دونیاسیندا هر کیمسه نین تکجه اؤز شخصی دویغولاری اوچون یوخ، بلکه کیم لیگیندن آسیلی اولاراق دونیانین هر بیر نوقطه سینده یاشایان اینسانلارین وارلیغین و تاریخین اؤز اینجه لیگی و گؤزه للیگی ایله قورویوب ساخلاماقدادیر.

داها دوغروسو هر بیر کیمسه اؤز دیلینده بیر ماهنی اوخویور، اُو ماهنی نین آننامی،بو دونیادا (منده وارام) دئمک دیر. ائلیمیزی فرهنگی یوروشلردن فُوروماق اوچون خوش سسلی گنج لره ایمکان یارادیب مئیدان آچماق گره کلیدیر. اوخوماق صنعتی ماهنیلاردان باشلانیر و ماهنیلار بیزیم هویتیمیزین آرخا و دایاغیدیر. ائله جه ده اولو بابالاریمیزدان قالمیش یادیگار و خاطیره لردیر کی بو توکنمز خزینه نی گؤز به به یی کیمی قُوروماق و باشاردیقجا ایره لی لندیرمک هربیر موسیقی چی نین میللی بورجودور.مثلا آشاقی داکی ماهنی دا گؤرورسوز کی اوخویان اؤز اِل اوباسی ویوردونو دونیایا تانیدیر واِشیدَنده بو ماهنی واسیطه سیله آد آپاریلان اؤئلکه نین دیلی ،مدنیتی وعادت عنعنه سی ایله تانیش اولور

آذربایجان ماهنیلاری

یولار تک دوشنیم آیاقلارینا

سنه یالواریم می؟ بو ممکن دئییل

قویمارام قلبیم تک ووقاریم سینا

آلچالیب یاشاماق عمور گون دئییل

دئمیرم سن اوجا بیر داغسان ائیل

دئمیرم علاجیم قالیبدیر سنه

نه سنده محبت قارا پول دئییل

نه من دیلنچی یم ال آچیم سنه

گئتمک ایستیرسن نه دانیش نه دین

یوخ اول اوزقلارتک دوماندا چنده

نه ییمی سئومیشدین دئییه بیلمدین

ایندیسه یوز عییب گرورسن منده

********************************

یاشا آذربایجان

چوخ کئچمیشم بو داغلاردان

دورنا گؤزلو بولاغلاردان

آیریلارمی کونول جاندان

آذربایجان ! آذربایجان !

یاشا یاشا آذربایجان !

آی آنام آذربایجان !

ائل بیلیر کی سن منیمسن

یوردوم ، یووام ، مسکنیمسن

آنام ، دوغما وطنیمسن

آذربایجان ! آذربایجان !

داغلارینین باشی قاردیر

آغ اؤرپگی بولودلاردیر

اوغلون ، قیزین بختیاردیر

آذربایجان ! آذربایجان !

********************************

اودونا چوخ یانمیشام

باشینا چوخ دولانمیشام

یولوندا دایانمیشام

یار گلدی ، یار گلدی ، یار گلدی

اوزونه اؤزوم قوربان

سؤزونه بو سؤزوم قوربان

گؤزونه گؤزوم قوربان

یار گلدی یار گلدی یار گلدی

الینده ایپک دسمال

یار گلدی قوربانی اولوم

چکمیشم حسرتینی

غمینی محبتینی

بو اودور یوخسا خیال ؟

یار گلدی یار گلدی یار گلدی

گئتمه مندن اوزاقا

کونلومو سالما فراقا

سئودیگیم آی ائل اوبا

یار گلدی یار گلدی یار گلدی

قویمارام بیرده گئده

یارینی حسرت لی ائده

قوی دییم من یئنه ده

یار گلدی یار گلدی یار گلدی

**********************************

نار نار

گول چیچگی دره رم نار نار

الوان چلنگ هؤره رم نار نار

هردم سنی گؤرنده نار نار

اؤز بختیمی گؤره رم نار نار

داغلارا گون دوشیدی نار نار

دئمه : نئچون دوشیدی ؟ نار نار

بیزیم ائوین یانیندان نار نار

یولون هر گون دوشیدی نار نار

قانادلانیب اوچایدیم نار نار

غمدن اوزاق قاچایدیم نار نار

اوره گیمی بیر آخشام نار نار

سئودیگیمه آچایدیم نار نار

دوستو یاددان سئچیدیک نار نار

بوز بولاغدان ایچیدیک نار نار

باری بیزیم کوچه دن نار نار

بیر گون قوشا کئچیدیک نار نار

********************************

آی لولو

آی لولو ، قیزیل اوزوک فیروزه

آی لولو ، گئدین دیین خوروزه

آی لولو ، بو گئجه بانلاماسین

آی لولو ، یار گله جکدیر بیزه

آی لولو ، یار دویمه لری مرجان

آی لولو ، بو داغدا مارالیم وار

آی لولو ، اووچویام یاراغیم وار

آی لولو ، نه گئجه یوخوم گلیر

آی لولو ، نه گوندوز قراریم وار

آی لولو ، یار دویمه لری مرجان

آی لولو ، یونومو داغا وئررم

آی لولو ، داغا قاداغا وئررم

آی لولو ، اگر وصالا یئتسم

آی لولو ، جانیم صاداغا وئررم

آی لولو ، یار دویمه لری مرجان

********************************

راز آخار لیل ایله
دسته دسته گول ایله
من یاریمی سویرم
شیرین شیرین دیل ایله

باغچا لاری ساری گول
یاری غونچا یاری گول
گِج آچیلدین تِز سولدون
اولمایایدین باری گول

آی لاچین، جان لاچین، من سنه قوربان لاچین

یری یری نیشان یار
یری عشقه دوشَن یار
ایلچی لری قیریلمیش
اوزو ایلچی دوشَن یار

آلما آتدیم نا رگلدی
کتان کوینک دار گلدی
قاپی یا کولگه دوشدی
ایه بیلدیم یار گلدی

آی لاچین، جان لاچین، من سنه قوربان لاچین

سو آتدین یارا دَیدی
الیم دیوارا دَیدی
دیلیم منیم گوروسون
نه ده دیم یارا دَیدی

اِله بی اودا یانسین
پروانه اودا یانسین
من یاندیم یار اوزوندن
اِشینسین اودا یانسین
آی لاچین، جان لاچین، من سنه قوربان لاچی

********************************

آنا جان

آنا جان باغریمی قان ائیله میشم من

گؤزلریمی گریان ائیله میشم من

بیر آلا گؤزلو یارین عشقی یولوندا

اؤز جانیمی قوربان ائیله میشم من

آنا جان آغرین آلیم

آنا جان باشینا دؤنوم

قوی دولانیم من

منیم اؤز سئوگیلیمه

حیران اولوم من

گولو خندان کیمی دیر یارین لبلری

جیرانا بنزر اونون آلا گؤزلری

ایکی کلمه دانیشیب آیریلدی مندن

قلبیمه نور آلدی شیرین سؤزلری

آنا جان عشق اودونا یانمامیشام من

هله ده بیر تجروبه آلمامیشام من

نه یامان اولور یاردان آیری دوشنده

بلکه ده یاخشی یامان قانمامیشام من

**********************************

ائولری وار خانا خانا

ائولری وار آی آمان ، خانا خانا

من کول اولدوم آی آمان ، یانا یانا

یایلیغینین یانی بوتا

سالدی منی آی آمان ، یانار اودا

اوبالاری آی آمان ، اویماق اویماق

یالان سؤزدور آی آمان ، یاردان دویماق

اوزو گول لبلری قایماق

یالان سوزدور آی آمان ، یاردان دویماق

هئچ اولمازمیش آی آمان یاردان دویماق

یالان سوزدور یالان سوزدور یاردان دویماق

**********************************

داغلار گؤزلی

گؤزل سونا گئتمه دایان

اورک ده سؤزوم وار

گل ائیله مه باغریمی قان

گؤزونده گؤزوم وار

جانیم قوربان تئلینه

شیرین شیرین دیلینه

قاشین گؤزون زیل قارا

عاشیقی چکمه دارا

سنی گول کیمین درک

آی داغلار گوزلی

سینه میز اوستونده سرک

آی داغلار گوزلی

دومان چؤکدو داغ باشیندا

آی گؤزل گل بری

گل دولانیم من باشینا

آی گوزل گل بری

**********************************

اوره ییمده ن خبرسیز

ایتیردیم اوزوم سنی

بویلانیب یولا یئنه

آختاریر گوزوم سنی

من سنی بو دونیادا

نئجه سالماییم یادا

یاتیرام یوخومدادا

آختاریر گوزوم سنی

آختاریر…

سن آسمان من دنیز

آیریلمیشیغ داها بیز

یئنه منده ن خبرسیز

آختاریر گوزوم سنی

من سنی بو دونیادا

نئجه سالماییم یادا

یاتیرام یوخومدادا

آختاریر گوزوم سنی

آختاریر…

اوخویان :

باشاریقلی ایگیدیمیز رحیم شهریاری

**********************************

آذربایجان اوغلویام

اوزاق – اوزاق ائللرده آدیــــن وار عـــنوانین وار

داستانلارا سیغمایان شهرتین وار شانین وار

قــــهرمانــــلار ایچیـــنده نئچــــه قهرمانین وار

جوانشیرن، بابک ن نبی ین کـــوراوغلویان

آذربایجان اوغلویام

نیظامی لـــــر اؤولادی ، نسیمیلر نسلـــی یم

یوردوم اودلار یوردودور ، من گونش نفسلی یم

طبیعتیم بئله دیر، توی – بایرام هوســــلی یم

اوره یی دوست سوراقلی ، سوفره سی قوناقلییام

آذربایجان اوغلویام

وطن اولوب ازلدن صحبتیمده ، سؤزومده

وطنده اوجالیبدیر ، اؤولادیــــم دا اؤزوم ده

قوی دونیا باشدان – باشا جنت اولسون گؤزومده

اوره ییمله قانیملا ، بو توپراغا باغلییــــام

آذربایجان اوغلویام فرزند آذربایجانم

**********************************

آی قاداسی

قاشلارین هلال

آغ اوزونده خال

کؤرپه بیر مارال

آی قاداسی

لبلرین شکر

اولماسا اگر

کیم نازین چکر

آی قاداسی

یاندیم عشقینه

قوربانام سنه

ناز ائتمه منه

آی قاداسی

سئودیگیم نگار

آغ اوزونده خال

کورپه بیر مارال

آی قاداسی

**********************************

سارای

آرپا چایی آشدی داشدی*سئل سارانی آلدی قاشدی

جوت باجی نین گؤزو یاشدی*آپاردی سئللر سارانـــی

بیــــــــــــراوجا بویلو بالانی

گئدین دئیین خان چوبانا*گلمه سین بــو ایـــــل موغانا

گلــــــــسه باتار ناحـــــق قانا*آپاردی سئللر ســــارانی

بیــــــــــــراوجا بویلو بالانی

آرپا چایی درین اولماز* آخار ســـــــــولار ســـرین اولماز

سارا کیمی گلین اولماز* آپاردی سئللـــــر ســــــارانی

بیــــــــــــراوجا بویلو بالانی

**********************************

نازین اؤلدوره جک
گولوشون بام باشقا
جمالین تاماشا
نئیلیم گؤزل قاشا
نازین اؤلدوره جک

نازین اؤلدوره جک
نازی اؤلدوره جک
نازی اؤلدوره جک

عطرین باهار یئلی
دوداقلار تر گولو
گل دوتوم من الین
نازین اؤلدوره جک

نازین اؤلدوره جک
نازین اؤلدوره جه ک
نازین اؤلدوره جک

قمتین بیر چینار
جمالین گئجه آی
اولماز سنه بیر تای
نازین اؤلدوره جک

نازین اؤلدوره جک
نازین اؤلدوره جک
نازین اؤلدوره جک

نازین اؤلدوره جک
گولوشون بام باشقا
جمالین تاماشا
نئیلیم گؤزل قاشا
نازین اؤلدوره جک

نازین اؤلدوره جک
نازی اؤلدوره جک
نازی اؤلدوره جک

عطرین باهار یئلی
دوداقلار تر گولو
گل دوتوم من الین
نازین اؤلدوره جک

نازین اؤلدوره جک
نازین اؤلدوره جه ک
نازین اؤلدوره جک

قمتین بیر چینار
جمالین گئجه آی
اولماز سنه بیر تای
نازین اؤلدوره جک

نازین اؤلدوره جک
نازین اؤلدوره جک
نازین اؤلدوره جک

**********************************

تویلار مبارک

تویو باشلیرام سازینان شیرین شیرین آوازینان

گلین گلیری نازینان تویلار مبارک مبارک بادا

ای گولو ریحان ، ریحان بیچه ره م من

عروس یولوندا جاندان گئچه ره م من

نه گؤزلدیر بیزیم داماد همیشه اولا گؤنلو شاد

ائوی اولا دائم آباد تویلار مبارک ، مبارک بادا

ای گولو ریحان ، ریحان بیچه ره م من

داماد یولوندا ، جاندان گئچه ره م من

چکیلین عروس یئریسین شوقو ائیوانی بوروسون

دئیینه ن دیلین قوروسون تویلار مبارک ، مبارک بادا

ای گولو ریحان ، ریحان بیچه ره م من

داماد یولوندا ، جاندان گئچه ره م من

عروس گولدور یاناقلارین گولدن گؤزل دوداقلارین

خوش گلیبدیر فوناقلارین تویلار مبارک ، مبارک بادا

ای گولو ریحان ، ریحان بیچه ره م من

عروس یولوندا ، جاندان گئچه ره م من

بازاردان آلدیم قازانی او قازانی بو قازانی

ساغ اولسون اوغلان دوغانی تویلار مبارک ، مبارک بادا

ای گولو ریحان ، ریحان بیچه ره م من

داماد یولوندا جاندان گئچه ره م من

بازاردان آلدیم سئینی او سئینی ، بو سئینی

خوش گلیب آقا قئیینی تویلار مبارک ، مبارک بادا

ای گولو ریحان ، ریحان بیچه ره م من

عروس یولوندا ، جاندان گئچه ره م من

**********************************

آی جانی یانمیش

اولدوزسان آیسان ، آی جانی یانمیش

چیچکلی یای سان ، آی جانی یانمیش

بیزی یارادان ، اولو تانری دان

سن منه پای سان ، آی جانی یانمیش

سن بو باشیما بلاسان ، بلا ، بلا

سنی گؤرنده دوشدوم نه حالا ، حالا

گول کیمی ترسن ، آی جانی یانمیش

نه بخده ورسن ، آی جانی یانمیش

یاناغی غونچه ، آغزی پوسته سن

یئریشی جئیران ، بویو بسته سن

وارمی دئولتیم ، قوی سنین اولسون

بیر جانیم قالیب ، اونو ایسته سن

سن بو باشیما بلاسان ، بلا ، بلا

سنی گؤرنده دوشدوم نه حالا ، حالا

جانلار آلاندی ، بو قاشین گؤزون

قلبیمه محرم ، هر شئیین سؤزون

سانکی دونیادان ، اوزولور الیم

بیر یول اوزومه گولنده اوزون

سن بو باشیما بلاسان ، بلا ، بلا

سنی گؤرنده دوشدوم نه حالا ، حالا

اوخویان : مناف آقایوف

***************************

آیریلیق ماهنی سی

فیکریندن گئجه لر یاتا بیلمیرم

بو فیکری باشیمدان آتا بیلمیرم

نئینیم کی سنه چاتا بیلمیرم

آیریلیق، آیریلیق ، آمان آیریلیق

هر بیر دردن اولار یامان آیریلیق

آیریلیق، آیریلیق ، آمان آیریلیق

اوزوندور هیجرینده قارا گئجه لر

بیلمیرم من گئدیم هارا گئجه لر

ووروبدور قلبیمه یارا گئجه لر

آیریلیق، آیریلیق ، آمان آیریلیق

هر بیر دردن اولار یامان آیریلیق

یادیما دوشنده آلا گوزلرین

گویده اولدوزلاردان آلام خبرین

نئیله ییم کسیبدیر مندن نظرین

آیریلیق، آیریلیق ، آمان آیریلیق

هر بیر دردن اولار یامان آیریلیق

آیریلیق دردینی چکمه ین بیلمز

یاردان آیری دوشن گوز یاشین سیلمز

دئییرلر اینتظار خسته سی اولمز

آیریلیق، آیریلیق ، آمان آیریلیق

هر بیر دردن اولار یامان آیریلیق

نئجه کی ائلیمدن آیری دوشندن

سورار بیربیرینی گوروب بیلندن

حسرتله سیزلار یار داییم بو غمدن

آیریلیق، آیریلیق ، آمان آیریلیق

هر بیر دردن اولار یامان آیریلیق

ایل لردی اوزاقام آرخام ائلیم دن

بلبلم دوشموشم آیری گولوم دن

جور ایله آییریب شیرین دلیم دن

آیریلیق، آیریلیق ، آمان آیریلیق

هر بیر دردن اولار یامان آیریلیق

اوولوبدور بیگانه یاریم_ یولداشیم

غریبه ساییلیر سئوگیم – سیرداشیم

بوجاوان چاقیمدا آغاردیب باشیم

آیریلیق، آیریلیق ، آمان آیریلیق

هر بیر دردن اولار یامان آیریلیق

منی آغلاداندان گولوش ایسته رم

آیری دوشنیمله گوروش ایسته رم

حصاری ییخماقا یوروش ایسته رم

آیریلیق، آیریلیق ، آمان آیریلیق

هر بیر دردن اولار یامان آیریلیق

سئوگیلیک اولوبدور شانی فرهادین

سئوگی سی هاردادیر ،هانی فرهادین

دییه ره ک چیخاجاق جانی فرهادین

آیریلیق، آیریلیق ، آمان آیریلیق

هر بیر دردن اولار یامان آیریلیق

***************************

قالالی

بوگون آیین اوچودور

ده گولوم نانای آی نانی نای

گیرمه بستان ایچیدیر

یار ، گیرمه بستان ایچیدیر

دوداغلارین بال شکر

هئی ، دیلین بادام ایچیدیر

یار دیلین بادام ایچیدیر

قیز ، بئلین اینجه دیر ، آی اینجه

لبلرین غنچه دیر ، آی غنچه

دام اوستونده دامیمیز

ده گولوم نانای آی نانی نای

قوشا دیر ایوانیمیز

یار قوشادیر ایوانیمیز

سن اوردان چیخ من بوردان

هئی ، کور اولسون دوشمانیمیز

قوی کور اولسون دوشمانیمیز .

***************************

آی جانی یانمیش

اولدوزسان آیسان ، آی جانی یانمیش

چیچکلی یای سان ، آی جانی یانمیش

بیزی یارادان ، اولو تانری دان

سن منه پای سان ، آی جانی یانمیش

سن بو باشیما بلاسان ، بلا ، بلا

سنی گؤرنده دوشدوم نه حالا ، حالا

گول کیمی ترسن ، آی جانی یانمیش

نه بخده ورسن ، آی جانی یانمیش

یاناغی غونچه ، آغزی پوسته سن

یئریشی جئیران ، بویو بسته سن

وارمی دئولتیم ، قوی سنین اولسون

بیر جانیم قالیب ، اونو ایسته سن

سن بو باشیما بلاسان ، بلا ، بلا

سنی گؤرنده دوشدوم نه حالا ، حالا

جانلار آلاندی ، بو قاشین گؤزون

قلبیمه محرم ، هر شئیین سؤزون

سانکی دونیادان ، اوزولور الیم

بیر یول اوزومه گولنده اوزون

سن بو باشیما بلاسان ، بلا ، بلا

سنی گؤرنده دوشدوم نه حالا ، حالا

اوخویان : مناف آقایوف

***************************

آذربایجان ماهنیلاری

VN:F [1.9.22_1171]
به این مطلب امتیاز دهید!!
Rating: 0.0/5 (0 votes cast)

درباره‌ امیر تقی پور

امیر تقی پور، فوق لیسانس زمین شناسی اقتصادی هستم. (مدیر وب سایت) ........ ایمیل من: amirahare@gmail.com - سایت زمین شناسی: www.geoahar.ir

جوابی بنویسید

ایمیل شما نشر نخواهد شدخانه های ضروری نشانه گذاری شده است. *

*

شما می‌توانید از این دستورات HTML استفاده کنید: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

برای درج شکلک روی آن کلیک کنید

SmileBig SmileGrinLaughFrownBig FrownCryNeutralWinkKissRazzChicCoolAngryReally AngryConfusedQuestionThinkingPainShockYesNoLOLSillyBeautyLashesCuteShyBlushKissedIn LoveDroolGiggleSnickerHeh!SmirkWiltWeepIDKStruggleSide FrownDazedHypnotizedSweatEek!Roll EyesSarcasmDisdainSmugMoney MouthFoot in MouthShut MouthQuietShameBeat UpMeanEvil GrinGrit TeethShoutPissed OffReally PissedMad RazzDrunken RazzSickYawnSleepyFemaleMaleHeartBroken HeartRoseDead RosePeaceYin YangUS FlagMoonStarSunCloudyRainThunderUmbrellaRainbowMusic NoteAirplaneCarIslandAnnouncebrbMailCellPhoneCameraFilmTVClockLampSearchCoinsComputerConsolePresentSoccerCloverPumpkinBombHammerKnifeHandcuffsPillPoopCigarette

بیش از 6 هزار ضرب المثل ترکی در یک فایل PDF به زودی...